La perda población y el tresporte públicu, el papel qu'han tener los seutores productivos tradicionales nel rural asturianu o les implicaciones del turismu, les principales esmoliciones.
Aína celebró ayer la so tercer asamblea llocal en L'Infiestu onde taben convocaes les persones inscrites y non inscrites pero interesaes na organización en dellos conceyos de la zona oriental d'Asturies.
Una quincena de persones acudió a la casa la cultura de la capital piloñesa pa conocer meyor esti nuevu partíu políticu asturianista. Ellí, desplicáronse a les presentes los pasos daos nos últimos dos meses pa la constitución llegal de la organización y la consolidación n'afiliaes de les cerca de 200 persones inscrites nel congresu fundacional que tuvo llugar a entamos de payares.
Problemática comarcal
Amás, debatióse sobre problemes como la perda de población especialmente nes ales del país, les dificultaes pa dedicase a sectores tradicionales como la ganadería y l'agricultura, el deterioru de les redes de comunicación y tresporte, o les implicaciones del modelu actual de turismu. L'acentu púsose na importancia de la perspectiva cercana y l'autonomía a la hora de dar soluciones d'un partíu d'obediencia esclusivamente asturiana.
L'oxetivu de la formación ye echar a andar les agrupaciones llocales que tienen de constituyise nos conceyos con un mínimu d'afiliaes acordies cola so población. El partíu tien intención de caltener la comunicación telemática y física coles persones interesaes nes selmanes vinientes.
