Aurea Soto, absolta de prevaricación

O Xulgado do Penal número 1 de Ourense absolveu a ex concelleira socialista de Urbanismo do Concello de Ourense, Áurea Soto e a un técnico municipal dos delitos de prevaricación que lles imputaban pola concesión en 2011 da licenza de primeira ocupación á residencia do campus universitario, a pesar de que a promotora do edificio non executara as obras de urbanización. O fallo non é firme e cabe recurso ante a de Ourense. Na sentenza o xuíz indica que non resultou probado que a ex concelleira encargase ao técnico a elaboración dun informe co obxeto de que as licenzas urbanísticas fosen concedidas nin que soubese que a súa proposta, en caso de ser aprobada pola Xunta de Goberno Local, suporía “contravir a normativa urbanística”. A resolución tamén nega que a ex concelleira retardase intencionadamente a incoación dos expedientes de reposición de legalidade urbanística. O Xulgado do Penal número 1 de Ourense lembra que a concesión das licenzas de ocupación e apertura non foi axustada á legalidade, ao non se realizaren as obras de urbanización da contorna da residencia universitaria, pero subliña que “esa contravención da legalidade urbanística non pode levar a concluír que a conduta dos acusados sexa constitutiva dos graves delitos cuxa comisión lles imputa a acusación particular”. Así, destaca que o criterio aplicado polos investigados fora utilizado noutras ocasións polo persoal do Concello de Ourense e que nos atopamos ante unha cuestión interpretativa da norma que debe quedar á marxe do dereito penal”.

O xuíz considera que concorrían “as circunstancias que xustificaban a aplicación do devandito criterio”, tales como a imposibilidade de realizar as obras de urbanización ás que se supeditou a concesión de licenza por causa non imputable; a prestación de fianza, aval ou ingreso en metálico para garantir a súa realización; e o cumprimento dos trámites e requisitos esixidos.

“No exercicio dos seus respectivos cargos e responsabilidades, os acusados consideraron que a ausencia de realización das obras de urbanización, circunstancia da que eran plenamente conscientes, non lle era imputable á promotora da residencia universitaria”, salienta o titular do Xulgado do Penal número 1 de Ourense.