O alcalde de Ourense, Gonzalo Pérez Jácome e o presidente, Rafael Castro Armesto, e o ex presidente Alberto de Paula, da delegación en Ourense do Colexio de arquitectos de Galicia mantiveron esta mañá unha xuntanza na Alcaldía coa vontade de estreitar a colaboración entre ambas institucións a prol da cidade. Nesta primeira xuntanza abordaron dous asuntos fundamentais: o compromiso do Concello de axilizar a concesión de licenzas urbanísticas e convocar un concurso de ideas para a posta en valor das dúas marxes do río Miño ao seu paso pola cidade.
Ao remate da reunión, o presidente do colexio, Rafael Castro asegurou que foi unha “primeira toma de contacto” que se desenvolveu con “moi boa sintonía”, e de Paula pola súa banda expresou a total disposición do colexio “para colaborar por e para a cidade”. Neste senso, alcalde e arquitectos acordaron dar carácter regular a estes encontros para ir tratando diferentes temas, celebrando unha reunión cada mes. “Temos que ir da man do colexio claramente para sacar adiante a cidade urbanisticamente”, asegurou Gonzalo Jácome.
O alcalde de Ourense advertiu do “problema grave” que se presenta na actualidade nos prazos de concesión de licenzas, ao que se debe dar resposta, dixo, incorporando máis arquitectos que contribúan a axilizar os prazos.
A segunda liña de traballo tratada esta mañá é acometer un proxecto, dixo, para “embelecer, adecentar e unificar todo o circuíto del río Miño”, a través da sinatura dun convenio de colaboración entre o Concello de Ourense e o COAG para desenvolver “un gran concurso de ideas que será o prólogo para transformar as ribeiras do Miño"
