O servizo de transporte urbano do Concello de Ourense incorpora o seu segundo autobús eléctrico, que cubre a liña número 12 da cidade, no treito: antiga estación de autobuses - Pazo dos Deportes - Expourense.
O Concello e a empresa concesionaria Avanza continúan así coa incorporación progresiva de 10 novos vehículos eléctricos, a razón dun por semana, ás liñas do servizo público municipal. O primeiro deles entrou en servizo o xoves pasado, na liña número 26, que vai desde a Residencia até A Chavasqueira e cada semana irase sumando un vehículo máis. Os autobuses eléctricos incorporados ao servizo, subministrados pola empresa ourensá UNVI, están a funcionar a pleno rendemento, durante 16 horas ao día.
