Gadis renovou o acordo de colaboración coa proba deportiva “O Gran Camiño”, que ten como obxectivo atraer a mirada de cidadáns de todo o mundo sobre Galicia como destino turístico de interese, a través dun deporte que ten miles de afeccionados como o ciclismo.
A directora de Marketing de GADISA retail, Melisa Pagliaro, e Ezequiel Mosquera, ex ciclista profesional e organizador do evento, ratificaron o convenio nunha visita á sede central da compañía en Betanzos, na que tamén estivo presente Miguel Freire, responsable de relacións coa sociedade.
Xerar impacto positivo na contorna
O patrocinio desta cita deportiva internacional forma parte do compromiso de Gadis con xerar impacto positivo na súa contorna apoiando aquelas accións relevantes e que crean valor nas comunidades nas que está presente. “O Gran Camiño” converterase por segundo ano nun gran escaparate para exaltar a riqueza patrimonial e cultural das catro provincias galegas, un propósito ao que se suma a cadea de supermercados co seu apoio.
Neste sentido, desde Gadis indícase que é unha oportunidade única para coñecer roteiros e localidades con encanto de Galicia mentres se goza dun deporte que a empresa pon como exemplo polo esforzo e afán de superación, valores que comparten.
Do 23 ao 26 de febreiro
A conta atrás empezou para esta cita deportiva de primeiro nivel, que arrinca o próximo 23 de febreiro cunha primeira etapa que parte da Muralla de Lugo e transcorre por diferentes trazados do Camiño de Santiago da provincia ata finalizar en Sarria. O día 24, o pelotón iniciará a súa andaina na histórica localidade de Tui, percorrerá unha parte do Camiño Portugués con ascenso ao Monte Trega, na Guarda, onde remata o percorrido.
Na xornada seguinte, a etapa Reina terá como testemuña á provincia de Ourense, desde Esgos a Rubiá, con final no Parque Natural da Enciña da Lastra. Despois de transitar por lugares emblemáticos vinculados ao Camiño de Santiago, o colofón será o domingo 26 na provincia da Coruña cunha contrarreloxo desde Novo Milladoiro ata a Praza do Obradoiro, onde está situada a meta.
Responsabilidade Social Corporativa
Esta colaboración forma parte do programa de Responsabilidade Social Corporativa da empresa, con máis de 1.900 accións anuais, un 39% no ámbito deportivo. Cabe destacar o seu apoio á organización dos diferentes actos conmemorativos do Xacobeo desde 1998, que constitúen a principal fonte de atracción de turistas a Galicia a través do Camiño de Santiago. Na esfera deportiva, o seu patrocinio ao Equipo Paralímpico Español desde o 2007, entre outros.
