O Teatro Principal acolleu a presentación de “O Camiño Mozárabe. Sangue, suor e fe”, un documental con guión do xuíz ourensán José Antonio Vázquez Taín e producido por Amarola co apoio da Deputación de Ourense e a Xunta de Galicia. O vicepresidente primeiro da Deputación, Rosendo Fernández, interveu na presentación de “O Camiño Mozárabe. Sangue, suor e fe” xunto ao delegado da Xunta de Galicia, Gabriel Alén, e o propio impulsor dun documental que resume un proxecto con máis de dous anos de investigación, sendo deseñado para poñer o foco de atención do público no Camiño Mozárabe e pondo en valor a súa fonda pegada histórica.
Rosendo Fernández lembrou na súa intervención as raíces de Vázquez Taín en A Merca e destacou a súa traxectoria como xuíz e escritor. O vicepresidente primeiro reivindicou a “aposta do goberno provincial polo audiovisual, unha potente ferramenta para difundir a nosa provincia a nivel global”.
O responsable do documental, José Antonio Vázquez Taín, agradeceu o apoio da súa familia, a colaboración dos expertos e alcaldes dos concellos do Camiño Mozárabe e recoñeceu o apoio da Deputación de Ourense “por empurrarme a realizar este proxecto”. Pola súa banda, Gabriel Alén definiu ao Camiño Mozárabe, “e en xeral, todos os Camiños de Santiago”, como “a mellor postal de Galicia”, sinalando que “na Xunta de Galicia consideramos fundamental seguir potenciando o Camiño de Santiago, con elementos de difusión como este documental”.
A memoria deste roteiro ancestral
O documental “O Camiño Mozárabe. Sangue, suor e fe” constrúe un relato audiovisual en formato documental que enxalza a memoria deste roteiro ancestral, abordando os roteiros de peregrinación ademais de afondar no intercambio de culturas e o comercio entre o sur e o norte da Península Ibérica.
O documental de Vázquez Taín relata máis dun milenio da historia da Vía da Prata e recolle, segundo remarcan os seus responsables, “con fidelidade a súa evolución dende a época prehistórica a modo de conector entre o Mediterráneo e as augas do Atlántico”.
