A Xunta habilita dúas marquesiñas na contorna da estación de autobuses de Ourense que funcionarán desde mañá como parada provisional ata a entrada en servizo da nova terminal.
A Consellería de Infraestruturas e Mobilidade, que está a traballar na demolición da actual estación de autobuses, acondicionou unha zona anexa á terminal e dotouna de marquesiñas para dispoñer as correspondentes paradas. Trátase de facilitar a prestación e uso dos servizos de transporte interurbano que operan nesta estación.
A demolición da actual terminal de autobuses, cun investimento máis de 523.000 euros, comezou hai dúas semanas cos traballos previos de acondicionamento da parada de autobuses provisional e retirada do material de interior. Estes traballos realizaranse de xeito paralelo ás obras en execución da nova estación de autobuses da intermodal no barrio da Ponte, que seguen a avanzar a bo ritmo.
A actual estación de autobuses foi construída hai máis de 30 anos. Dadas as súas condicións e a inconveniencia de deixar un edificio destas dimensións desocupado nunha zona urbana, a Xunta decidiu redactar un proxecto de demolición. A intervención ten como obxectivo deixar despexado o solar e aproveitar este espazo para dotacións de carácter social, concretamente, para a construción dunha residencia da terceira idade.