Presentación

Pechamos un novo ano de radio lectora en Cronopios con Pedro Feijoo, escritor co que inauguramos a nosa aventura entre micros e libros hai sete anos. Desde entón, Pedro nunca faltou á súa cita con nós cada vez que publicou unha nova novela e, nesta ocasión, volveu con "Un lume azul", unha historia de violencia da que o lector non debe saber nada antes de comezar. Durante a conversa, Pedro confesounos que a súa bandeira é a do entretemento e favorecer o goce lector, ao mesmo tempo que utiliza a escrita para lanzar preguntas e intentar entender moitas cousas que lle quitan o sono. Neste podcast podes volver escoitar a entrevista con Susana Pedreira.

“O libro da filla" é un relato profundo e inquietante no que a autora parte dun caso real de abuso no ámbito familiar para obrigarnos a ollar de fronte o mellor e o peor de nós como persoas e como sociedade. Durante a conversa na librería Cronopios coñecemos a Helena Sánchez, a gran protagonista da novela, unha muller que pasa dos cincuenta anos e que lle serve a Inma López Silva para poñer o foco sobre unha idade na que as mulleres sinten o peso do corpo e, ao mesmo tempo, a oportunidade para liberarse e rachar coas convencións que reprimen e controlan as súas vidas. Estamos ante unha novela moi política que apela á responsabilidade individual para decidir que versión dos feitos queremos crer e na que a verdade e a mentira son dúas protagonistas máis. Neste podcast podes volver escoitar a entrevista con Susana Pedreira.

Xornada festiva na cidade de Pontevedra que aproveitamos para repasar a actualidade, buscar a previsión do tempo e rodearnos de expertos para analizar as novidades lexislativas en materia laboral: desde María Cobián y Asociados visitáronnos Pilar Calvo e Daniel Martínez. Ademais, hoxe estamos entre micros e libros desde Cronopios coa escritora galega Inma López Silva.